FELIZ 2015!

Os libros ilustrados reúnen dúas artes: a da palabra e a da imaxe. Como exemplo, este Diario 1921, de Alfonso R. Castelao. Trátase dun exemplar facsímile. Neste diario Castelao plasmou as súas experiencias nunha viaxe por Francia, Bélxica e Alemaña realizada do 26 de xaneiro ao 10 de outubro de 1921.

Cómpre sinalar que, en varias ocasións, os feitos ou cadros que describe Castelao nesta viaxe deron pé a algúns dos seus textos, debuxos ou cadros posteriores. Como tal, cando conta que viu o cadro de Brueghel no Louvre, A parábola dos cegos, tema que vinte anos despois serviría de base dunha das súas láminas da serie Cegos: os meus compañeiros.

Libros que contan historias dun monstro bondadoso, unha raíña malvada,  unha princesa que dorme, un príncipe-ra, un peixe que tragou un diamante para sacar o pescador da súa miserenta vida...

A infancia é o territorio dos soños e dos contos infantís, que nunca foron verdade pero que ás veces parecen tan reais...

Un novo tempo que comeza, cheo de esperanzas, ilusións e proxectos. Que o ano 2015 nos sexa levadeiro!

Desexamos que tiverades un bo 2014 e que o 2015 sexa aínda mellor! Que todos os vosos soños se cumpran e que neles non falte un bo libro!

Dende o ano 2005, Galicia forma parte do universo Julio Cortázar. A decisión de incorporar a Galicia a ese mapa de emocións e de literatura, foi de Aurora, administradora do seu legado. Foi ela quen acordou depositar no Centro Galego das Artes da Imaxe (CGAI), o seu arquivo fotográfico e o de Cortázar. As razóns desta decisión foron explicadas por ela na inauguración da exposición Ler imaxes: O arquivo fotográfico Julio Cortázar, da que foi comisaria Rocío Santa Cruz, organizada a partir do legado recibido, acto celebrado no pazo de Fonseca no outono do ano 2006. Aurora invocou entón a relación mantida por Cortázar cos galegos da emigración e do exilio en Bos Aires, en particular con Luís Seoane, Arturo Cuadrado, Lorenzo Varela e Rafael Dieste. Pero alí, en Fonseca, como para confirmar vínculos maiores, estaba o pintor Leopoldo Nóvoa, amigo dos últimos anos, quen acollía a un Cortázar só e enfermo, no seu estudio de Nogent sur Marne, nos arrabaldes de París. Poderíamos lembrar agora que foron os galegos quen primeiro repararon na súa calidade como escritor e tradutor, publicándolle relatos e encargándolle traballos de tradución para a editorial Nova. Tamén as visitas que xunto con Aurora realizou a Galicia, onde soñou con pasar un tempo vivindo ao xeito de Rouseau, dedicándose á pesca e a herborizar; a consciencia do idioma, expresado en máis dunha ocasión, en particular cando no caderno de notas de Rayuela, á hora de anotar o nome do xogo en varias linguas, facía constar: Mariola (Galicia, Coruña). Amais dos nomes xa expresados, fóronlle próximos: Francisco Porrúa, o editor de boa parte da súa obra, nacido en Corcubión; Mariquiña Valle Inclán; Eduardo Blanco Amor; José Ángel Valente; Ramón Chao; María Casares; Xosé Neira Vilas ou Antonio Pérez Prado.

Francisco X. Fernández Naval